02/12/2025

Qazaxıstanın bəzi məktəbləri Sovet dövrünün pioner və oktyabryat ənənəsini özlərinə məxsus şəkildə yenidən formalaşdırıblar. Pioner qalstuku və nişanını qazax bayrağının rəngləri ilə uyğunlaşdırıblar, adını isə qazaxca “Jasqıran, Jasulan” qoyublar – mənası da “gənc ordu” deməkdir. Bizim üçün xüsusi təşkil olunmuş bu tədbirdə bala bilgələrə bayraq və nişanlarını təqdim etdik!

Məktəbin direktor əvəzi Çolpan xanım və komandası bizə misli görünməmiş qonaqpərvərlik göstərdi, bütün məktəbi gəzdik. Dövlət məktəbi olsa da, bir çox özəl məktəbdən heç nəyi ilə geri qalmır:

• Müəllimlər üçün ayrıca paltar dolabları, uşaqlar üçün ayrıca dolablar;

• İbtidai sinif şagirdləri üçün günorta yeməyi;

• Valideynlərlə görüş üçün xüsusi otaq və maraqlı tərtibat;

Çimkəndin kənarında yerləşən bu məktəb ab-havası, nizam-intizamı və müasir yanaşması ilə sanki şəhərin mərkəzindəki nümunəvi bir təhsil ocağını xatırladır.

Qazaxıstanın Türküstan şəhərində Türk Dünyası Mədəniyyət Təşkilatı-TÜRKSOY tərəfindən Azərbaycan nəşriyyat sektoruna yüksək qiymət verən mühüm addım atılıb. Azərbaycan Nəşriyyatları Assosiasiyasının sədri, Hədəf Şirkətlər Qrupunun qurucu direktoru dosent Şəmil Sadiq Türk dünyası mədəniyyəti və incəsənətinə verdiyi töhfələrə görə TÜRKSOY medalı ilə təltif edilib.

Mükafatı TÜRKSOY-un Baş katibi Sultan Rayev təqdim edib. Medalda qeyd olunur ki, təltif Türk dünyasının mədəniyyəti və sənətinə göstərilən xidmətlərin və uzun illər ardıcıl fəaliyyətin qiymətləndirilməsi məqsədi daşıyır.

Şəmil Sadiq çıxışında bu mükafatı bütün Hədəf Komandası, Azərbaycan nəşriyyatları Assosiasiyası, eləcə də kitabı həyat tərzinə çevirən oxucuların uğuru kimi dəyərləndirib:

“Bu medal mənim şəxsi fəaliyyətimlə yanaşı, Hədəf Müəllimlərinin, Azərbaycan kitabının, nəşriyyatlarının, müəllif və tərcüməçilərimizin, kitab sərgilərimiz və oxu layihələrimizin tanınması deməkdir. Türk dünyasının ortaq mədəni məkanında Azərbaycan sözünün daha gur səslənməsi üçün bundan sonra da çalışacağıq.”

Təltif, Şəmil Sadiqin

Türk dünyası miqyasında həyata keçirdiyi layihələrin – beynəlxalq kitab sərgiləri, uşaqlar üçün nəşr proqramları, müəllif mübadiləsi və oxu marafonlarının – davamlı və sistemli şəkildə qurulmasının məntiqi nəticəsi kimi qiymətləndirilir.

TÜRKSOY medalı Şəmil Sadiqin Türk dünyasında kitab və mədəniyyət körpülərinin qurulmasında oynadığı rolun, eləcə də Azərbaycanı regionda nüfuzlu nəşriyyat mərkəzinə çevirmə istiqamətindəki fəaliyyətinin rəmzi ifadəsi kimi tarixə düşdü.

Qeyd edək ki, 2023-cü ildə Bakı Beynəlxalq Kitab sərgisində Şəmil Sadiqin

Xoca Əhməd Yəsəvinin ölümündən bir neçə yüz il sonra Əmir Teymur onun məqbərəsini tikdirmək, ora xüsusi hədiyyələr göndərmək qərarına gəlib. Bu faktın özü belə göstərir ki, Yəsəvi təkcə dini şəxsiyyət deyil, həm də türk dünyasının yaddaşında dərin iz buraxmış bir mədəni, mənəvi simadır. Türbənin içində Əmir Teymur tərəfindən göndərilən metal bir tamğa var; üzərində Peyğəmbərin, əhli-beytin, 12 imamın və hətta Mehdinin də adları yazılıb. Deyirlər, iranlılar bunu görəndə “elə şiə olub” deyiblər. Amma nə onun yazılarında, nə də yaşam tərzində şiəlik üslubu görünür. O, daha çox sufi, irfan adamıdır; insanı daxilə, Tanrı ilə rabitənin mahiyyətinə dəvət edən bir yolçu…

Min ilə yaxındır ki, ucalan bu möhtəşəm türbə adamı valeh edir. Həm memarlıq xüsusiyyətləri, həm də ab-havası ilə bizə Səlcuqi dövrünün abidələrini xatırladır. Geniş tağlar, qübbələr, mavi-turkuaz kaşılar, daşın və rəngin dili ilə danışan naxışlar – hamısı birlikdə türkün həm zahiri, həm batini aləmini ifadə edir. İçəri daxil olanda qəribə bir sükutla qarşılaşırsan; elə bil səsin bir az ucalanda, yüzillərin o üzündən gələn zikrləri pozacaqsan.

Ümumiyyətlə, Türküstan şəhərinin özü də maraqlı təəssürat yaradır. Şəhər sanki yenidən qurulur və bu yenilənmədə milliliklə müasirliyin çox gözəl sintezi hiss olunur. Açıq, fərah, aydın bir şəhərdir. Geniş və təmiz küçələr, ağ, qızılı və turkuaz rənglərin birlikdə yaratdığı vizual harmoniya adamı ilk baxışdan cəlb edir. Bir tərəfdə qədim Türküstanın nəfəsi, o biri tərəfdə müasir Qazaxıstanın dinamizmi görünür. Kiçik şəhərdir, 3–4 saata rahatlıqla gəzə bilirsən, amma bu bir neçə saatda həm tarix, həm mədəniyyət, həm də gələcəyə dair bir ümid görürsən.

Mənə elə gəlir ki, Türküstan təkcə Qazaxıstan üçün deyil, bütün türk dünyası üçün simvolik bir məkandır. Burda dərk edirsən ki, bizim ortaq tariximiz, ortaq mənəviyyatımız var və bu mərkəzdən qopan işıq yüz illərdir ki, Türküstanın sərhədlərini aşaraq hər tərəfə yayılır. Ona görə də yolunuz Mərkəzi Asiyaya düşsə, Türküstana mütləq zaman ayırın. Bu şəhər həm gözlə görüləsi, həm də könüllə hiss ediləsi bir məkandır.