Böyük türkoloq Murad Adcı “Qıpçaq çölünün yövşanı” əsərində yazır ki, türklər həmişə döyüşdə qalib gəlir, amma siyasətdə uduzur. Buna görə də Çinlilərin siyasəti qarşısında tab gətirə bilmədilər.
XXI əsrin başlanğıcında, Zəfərin 5 illiyində Azərbaycanın yürüdüyü nizamlı və ağıllı beynəlxalq siyasət göstərdi ki, artıq biz siyasəti ən az savaş qədər bacarırıq. Bu qədər qarmaqarışıq və geosiyasi gərginliklərin yaşandığı bir zamanda Azərbaycan dövləti heç zaman büdrəmədi, hər dəfə əmin və düşünülmüş addımlarla irəlilədi. Rusiya, İran, Türkiyə, Amerika, Avropa – hər biri öz müstəqil siyasətini yürüdüb, hadisələrə öz maraqları prizmasından yanaşdı. Yalnız Türkiyə dost və qardaş münasibəti ilə daim yanımızda oldu. Amma Azərbaycan bu prosesdə ölkəsini heç bir zərbə altında qoymadan, ağır sınaqlardan uğurla çıxara bildi. Bu, liderinin güclü iradəsi, zəkası və siyasi bacarığı, ordusunun əzmi, xalqının güvəni ilə mümkün oldu. Bu dəfə “başsız atlı” olmadıq – həm atımız var, həm də başımız!
Tarixi anlara şahidlik edirik! Bizdən sonra gələcək nəsillər bizə görə utanmayacaq – başıuca, alnıaçıq, üzüağ olacaq!
Asta-asta, nəyi, nə zaman, necə edəcəyimizi bilərək yürüdük bu yolda. Mən xoşbəxtəm! Mən şadam, sevincliyəm! Arzum odur ki, heç bir zaman savaş olmasın, nə düşmən, nə də dost qanı tökülsün; insanlıq və sevgi qalib gəlsin!
Dünya duysun bu səsi – bu, türkün səsidir! Bu, ədalətin səsidir! Biz qalib dövlətin qalib vətəndaşlarıyıq!
Mən əminəm ki, “Sülhməramlılar buradan nə vaxt gedəcək?” sualının tərəddüdünü dəf etdiyimiz kimi, bir gün o yol da bizim olacaq! Gedib-gəlməsək də, o yol bizim olacaq, çünki bizimdir!
Şəhid ailəsinin, qazinin, köçkünün, qaçqının nə çəkdiyini tam dərk edə bilmədiyimiz kimi, blokadada yaşayan Naxçıvanlıların dərdini də yaşamayan bilməz! Son 100 ildə Naxçıvan həmişə çətinliklərlə üz-üzə qalıb – Sovetin ən ucqarı idi, müharibədə bədəndən ayrı düşmüş qol idi. İndi isə o qol yenidən bədənlə birləşir, canlanır. Yaxın gələcəkdə bu iqtisadi yol açıldıqdan sonra bizim camaat nə bilet dərdi çəkəcək, nə də məcburiyyət qarşısında qalıb İran yolunda hər an sərhədçilərin alçaldıcı davranışına məruz qalacaq. Çünki İran illərdir bizə “əlimizdə təsbeh, ağzımızda saqqız” verərək süni gərginlik yaşadıb!
Rusiya isə öz “ayı gücü” ilə qorxudub. Ümid edirəm ki, bu da bitdi və bitəcək! Qırılmış Turan xətti birləşəcək!
Gözün aydın, Vətən!
Gözün aydın, Millət!
