Çimkənd 147 nömrəli orta məktəb bizi güllə-çiçəklərlə qarşıladı, çox səmimi və maraqlı bir tədbirə şahid olduq.
Qazaxıstanın bəzi məktəbləri Sovet dövrünün pioner və oktyabryat ənənəsini özlərinə məxsus şəkildə yenidən formalaşdırıblar. Pioner qalstuku və nişanını qazax bayrağının rəngləri ilə uyğunlaşdırıblar, adını isə qazaxca “Jasqıran, Jasulan” qoyublar – mənası da “gənc ordu” deməkdir. Bizim üçün xüsusi təşkil olunmuş bu tədbirdə bala bilgələrə bayraq və nişanlarını təqdim etdik!
Məktəbin direktor əvəzi Çolpan xanım və komandası bizə misli görünməmiş qonaqpərvərlik göstərdi, bütün məktəbi gəzdik. Dövlət məktəbi olsa da, bir çox özəl məktəbdən heç nəyi ilə geri qalmır:
• Müəllimlər üçün ayrıca paltar dolabları, uşaqlar üçün ayrıca dolablar;
• İbtidai sinif şagirdləri üçün günorta yeməyi;
• Valideynlərlə görüş üçün xüsusi otaq və maraqlı tərtibat;
Çimkəndin kənarında yerləşən bu məktəb ab-havası, nizam-intizamı və müasir yanaşması ilə sanki şəhərin mərkəzindəki nümunəvi bir təhsil ocağını xatırladır.
