Mən bu sətirləri yazarkən içimdə 11 illik məktəb şagirdini, 9 illik universitet tələbəsini, 25 ilin müəllimini, 15 ildən artıq təcrübəsi olan sahibkarı daşıyıram. Hər addımda bir dərs, hər dərsdə bir xatirə, hər xatirədə bir nəticə var. Mən isə bu dərsləri, xatirələri və aldığım nəticələrin hər birini yazmağı özümə borc hesab edirəm – həm özüm, həm gələcək nəsillər üçün.
Dediyim kimi, mən bu kitabı “uğur hekayəsi” yazmaq üçün yox, gerçək həyat məktəbini təqdim etmək üçün yazıram. İllərdir müşahidə edirəm ki, gənclər uğura daha çox nəticə kimi baxırlar, proses kimi yox. Uğur onların gözündə sadəcə zirvənin özüdür. Amma reallıqda o zirvəyə qalxmaq illərlə davam edən səbr, səhvetmə cəsarəti, daxili intizam və doğru insanlarla yol yoldaşlığı tələb edir. Və inanın, insana ən çox zövq verən tərəf o uğura gedən yoldadır. 50 yaşınıza çatanda nə qədər şirkətiniz, pulunuz olduğunu düşünüb zövq almayacaqsız. Amma onu əldə etmək üçün çəkdiyiniz əziyyəti, bu yolda qazandığınız və bəzən itirməyə məcbur olduğunuz insanları, onların xüsusiyyətlərini xatırlayacaqsınız.
Məsələnin digər tərəfi isə uğurun ya bəxtlə, ya da başqa adamlar sayəsində qazanıldığı düşüncəsidir. Ona görə də bir çox hallarda hər kəsin uğurunda arxa planda kimlərisə axtarırlar.
Əgər sən bacardığın işi düzgün və davamlı görürsənsə, həyat səni gec-tez mükafatlandıracaq.
Bu kitabdan nə əldə edəcəksiniz?
Əgər bu kitabı oxuyursunuzsa, artıq başlanğıc nöqtəsindəsiniz.
“Başlamaq üçün mükəmməl olmaq lazım deyil, amma mükəmməl olmaq üçün başlamaq lazımdır”.
Bu kitab sizə riskin arxasında duran məntiqi, zəhmətin mənəvi tərəfini, insan idarəetməsinin səmimiyyətini, dəyişikliyin labüdlüyünü göstərəcək.
